مصيدة الزوجية

الفخ !! اللي كلنا بنجري عليه واللي بيهرب منه بنتهمه بالجنون او أشياء أخري مشينه لا داعي لذكرها منعا للاحراج .😶

عش الزوجية .. انه ذلك القفص اللامع الذي يخدعك جماله من علي بعد وكلما تقترب منه يزداد تلعلطلا في عينيك 👀💥إلي ان تدخله وأنت بكامل قواك العقليه والجسدية لتخرج منه كهلا محنيا .💀

لا لا بلاش افوره الجواز حلو وجميل أوي بطلوا تعقدونا بقي .. 👊

المشكله في مرحله ما قبل الجواز والبحث عن عروسه ومقابلة العريس والاجراءات الروتينيه دي .😏
في دي شويه نصايح كده للشباب والبنات عشان نحاول نتخطي المرحلة دي بسلام ونقابل الوحش بكل أريحية .
نبدأ بالرجالة حبايبنا ..

كيف تفوز بقلب العروسة👰💅

أولا كده : اوعي تفكر تروح اول زيارة بإيدك فاضية وبرده البطيخ والبرتقان وكيس الموز دول تاخدهم لعمتك 🤪ولو عملت ده اعرف انك هتتزحلق من ع الباب.👻
ثانيا : ايااااااااك تتجرأ وتلبس بدلة الحاج الكاروه😐 ولا اي بدلة اصلا 😲 معلش أركنها سنه كمان مش هيحصلها حاجه ما هيا بقالها تلاتين سنه ف الدولاب 😤

وياريت نركز ع الحزام والجزمة والساعة 👞⌚والباقي شكليات 🚭 وبرده اوعي تتغر بجزمتك وتدخل بيها ع السجاد عشان اقسم بالله لسه مغسول عشان جنابك.🔙
ثالثا : لو هتتقابلو بره ف ياريت يعني تسألهم تشربوا ايه ولما ترد بكسوف لا ميرسي⁦😊 تلح ف السؤال تاني وتاالت مش ما تصدق وتطلب عصير مانجه تقعد تشفط فيه🤦 لانها هتبصلك في كل شفطه والاسعاف هتنقلك قبل ما تكمل الكوباية 🤒وياريت يعني تتكرم وتدفع الحساب اعتبر انك خارج مع صاحبك يا جدع بلاش تبين العفانه من الاول .🤑
رابعا واحتمال تبقي أخيرا مش عارفه : متعملش فيها رمضان مبروك ابو العلمين وتمسك للبت الخرزانه وتزنقها ف لجنه مش امتحان فيزيا هو ⁦⁦🕵️⁩بدل ما تشتغلك ف الاحياء وتبهدلك ..🧟 أبدأ كده وخليك لطيف واتكلم عن نفسك لان احتمال ضعيف تبقي كبنت ومكسوفه كده ..تخيل !!💃
خامسا: ما انا قولتلك فوق احتمال مش اكيد انها تبقي اخيرا 🔝 وانا بنت وبرجع فكلامي عادي🤷 واهو رغيك الكتير ده خلاني انسي خامسا ..🤦 كفاية عليك كده واياك تدخل بالجزمه ع السجاد وابقي اغسل سنانك وانت رايح يا استاذ 🧘

بناتنا الحلوين 😍كيف تصطادين عريسا 🤵

انتو طبعا قمامير ومش محتاجين رغي كتير ( عنصريه وتحيز اه )
أولا : خليكي علي طبيعتك أبوس ايدك  والله العريس مش لازم يفضل يدور ع وشك من  ورا المكياج ⁦👩‍🎨⁩ ولو لقتيه قاعد يسبح متفكريش انك جميله لا ده مستغرب من الظاهرة الغريبة اللي قدامه .🌒
ثانيا : لو مبتعرفيش تلبسي كعب بلاااااش هو كده كده عارف انك قصيرة 👠

وعمو اللي اشتريتي منه الكعب عارف انك قصيرة وجيرانكم عارفين انك قصيرة والبيبسي اللي ف ايدك ده عارف انك قصيره وكل دول هيتاكدو أكتر لما تتقلبي في حضنه انتي والبيبسي .😵
ثالثا : انا عارفه انك ما صدقتي تلاقي عريس بس اتقلي انتي مش رايحه فرح ولا هو جاي يكتب كتابك ده انتي اول مره تشوفيه يا مدلوقة .. لبس بسيط كده جميل زيك متعمليش رقاصه ولا متسوله برده .🧕
رابعا : الكسوف والخجل ميزه وشيء لطيف وكل حاجه .. بس علبة التنت مش هتثبت ده نهائي ، مش هنعمل حنين حسان في البيت والله 😜

ومتفضليش باصة ف الارض برده يعني لازم تشوفي وش الكائن ده لأن احتمال يعني يجوا يسألوكي ايه رأيك فيه🤔 ولو عندك اسئله انطلقي بس متروحيش تقوليله انت ارتبطت قبل كده😒 عشان اقسم بالله غالبا هتلاقيه مفركش وهو ع باب شقتكم عاااااادي .🙈 ما هو اكيد مكنش عايش يبيع سبح 📿
خامسا بقي واخيرا :لما ربنا يكرمكم وتتخطبوا ابوس ايدك يا شيخه متروحيش تكتبي ع الفيس بوك نصي التاني وهدية ربنا ليا والباك بون والسمانة وبحبك ياحب عمري انتي لسه متعرفيش انه بيحب االكوارع يا ست الكل ولا سمعتي صوت شخيره وهو جايب اخر الشارع وبعدين عمري ايه يا بت ده انتي لسه عارفاه من يومين 😈

وأخيرا بقي عشان نلم الليله دي ياريت نتلم ونفكر كويس ونختار صح ونتقي ربنا😇 انتو بتختارو بني ادم هتصحوا كل يوم علي عماصه والشعر المنعكش وتسمعوا أحلي سنفونيات وهما نايمين .. ف حاولوا ع الأقل تختاروا اللي تكشيرته حلوه عشان مش هتشوفوا غيرها  😌

ودمتم سناجل ⁦✌️⁩