احترس ! اكتئاب ما بعد الولادة حقيقة ولا دلع ستات ؟

اكتئاب ما بعد الولاده حقيقه ولا دلع ستات !!🙈

عزيزي الرجل 🤚 لو انت شايف مراتك بتدلع ومزوداها اوي وان كل الستات بتولد عادي وتقوم تجري ف الشقه وتعملك سندوتشات حلاوه بالقشطه .. فالكلام ده ليك انت .⁦✌️⁩

اكتئاب ما بعد الولاده حقيقة ولا دلع ستات !! 

طبعا انت متفق معايا ان مراتك قعدت تقريبا ٩ شهور حامل زيها زي اي ست طبيعية ، واللي انت متعرفهوش ان الحمل ده مش مجرد كرش بيكبر كده زي كرش حضرتك بعد ما بتضرب حله المحشي التمام 🙈

الست العظيمه اللي كانت بتقف في المطبخ وبطنها قدامها مترين دي كانت حاسه بوجع في كل عظمه من جسمها ، ورجليها الوارمين اللي كل خطوه بيهم كأنها بتدوس علي حجاره سخنه ، طبعا مش هشغل بالك بالحموضه وكتمه النفس عشان الباشا الصغنن قاعد جوا ومريح علي القفص الصدري وكابس علي الرئتين . 👣⁦👩‍👧‍👧

سيبك من كل ده الحمدلله ولدت بقي سواء طبيعي ولمت عليكو الناس .. اااه ع فكره الم الولاده الطبيعي تاني اعظم الم بعد الحرق حيا!! اه والله، طب خد الكبيره⁦⬅️⁩ الم الولاده الطبيعي يعادل ألم كسر كل عظمه في جسم حضرتك بعد الشر عنك طبعا .

طيب ولدت قيصري ياستي ودفعت دم قلبي ونامت البيبي طلع ومحستش بحاجه .. ايوه عندك حق دي يادوب فاتحه ٧ طبقات ف بطنها ياعم ومتخيطه برا وجوا وملفوفه لفه هدايا .🤱

هتقولي انتي بترغي في كل ده ليه يا ست انتي ما انا عارف ومقدر وبحب مراتي وكنت مرعوب عليها وهي بتولد ! الله ينور عليك يا باشا⁦✅ وفرحنا بالمولود وكبرنا ف ودنه وجيبنالها فرخه بلدي تحطها في بطنها مكان البيبي 🤚

ايه ده استني كده .. مراتك ملهاش نفس تاكل !! بتعيط من غير سبب !! قاعده مكشره كده ومخنوقه ومش طيقالك كلمه !! مش قادره تنام وسهرانه متنحه !! او عاوزه تنام كتير وقافله الاوضه ع نفسها !! ياساتر يارب !! دي ممكن كمان مش طايقه البيبي ولا قادره تشيله ولا ترضعه !!

طب الحل ايه في الموضوع ده!! هتتخانق معاها وتزعق وتقولها ما الستات بتولد كل يوم وانتي عملتي ايه زياده عن الستات وانتي لا اول ولا اخر واحده تولد وامي ولدتني ونزلت الغيط تحصد الطماطم مع ابويا !! ⁦🗣️⁩

لا استني بس كده واهدي 👼

احترس !! اكتئاب ما بعد الولاده حقيقه مش دلع ستات خااالص

انا هشرحلك ايه بيحصل وافهمك ، اثناء الحمل في هرمونات كده بتتلغبط مش هشغل بالك باسامي علميه📴 المهم ان بعد الولاده الهرمونات بتاخد لفه كمان وتتلغبط تاني ف بيحصل نقص ف هرمونين مهمين جدا ومسؤلين عن السعاده ( الاستروجين والبروجيسترون ) ويا سوادك يا قرمط بقي لو هرمونات الغده الدرقيه قالت وانا مالي وراحت ملغبطه ! دخلنا في حاله اكتئاب يا باشا !!

اكتئاب مابعد الولاده حقيقه ولا دلع ستات !! حقيقه مليون في الميه وبيجي لاكتر من ٢٠٪ من الستات في العالم ولو ملحقناش وعالجناه ممكن يتحول لحاله اخطر اسمها الذهان وساعتها ممكن مراتك بعد الشر عنها اكيد تحاول تنتحر واحتمال تنجح ف الانتحار ❌

طيب اشمعني مراتي اللي هيجيلها ما امي مجالهاش واختي زي الفل والجيران والحبايب والقرايب ⁦☹️⁩ 

ولا مراتك عشان ملهاش لا حبيب ولا قريب ولا غريب 😭 لا لا خالص هو ملهوش سبب كده بيجي ع غفله 🤚 بس في ناس بتبقي معرضه ليه اكتر زي اللي جالها اكتئاب ف الحمل واللي عندها تاريخ وراثي من الاكتئاب واللي عندها ضغوط نفسيه وعصبيه وقله نوم وتعب وارهاق واللي طبعا جالها اكتئاب سابق في ولاده او حمل دي هتاخد مركز اول ⁦✌️⁩

طيب ايه الحل عشان الحق اكتئاب ما بعد الولاده انه ميتحولش لاكتئاب حاد او حاله ذهان !! 

٦ حلول لاكتئاب ما بعد الولاده ..

اولا . تقديم الدعم المعنوي ليها بعد الولاده ومساعدتها في الرعايه بالطفل ، يعني شيله هشتكه ودلعه وسيبها تتفرج ع التليفزيون ولا تشرب كوبايه شاي باللبن .💅🍼

ثانيا . توفير وسائل الراحه للأم ومساعدتها علي اخذ القدر الكافي من النوم ، ( تخيل ياباشا تبقي مطبق بال ٣ ايام ده انت مش هيجيلك اكتئاب ده انت هيجيلك تأخر عقلي )🧘

ثالثا . محاوله التخفيف عنها ومدحها ، مفيهاش حاجه لو قولتلها انتي عظيمه وصابره ع الوجع والتعب ، الله يكون في عونك ياحبيبتي ، ربنا يقويكي ، انتي ليكي الجنه .💆

رابعا .هاتلها شيكولاته وحلويات اه والله معلش هنصرف بس شويه اصل الشيكولاته بتعلي هرمون السعاده اوووي وبتعوض الناقص عنها .🍫

خامسا .اتكلم مع مراتك واسالها عن احساسها ايه واديها مساحه تعبر عن اللي مفرحها او مزعلها🍨

 ولو حسيت انها داخله علي مرحله اكتئاب او شميت ريحه اي افكار انتحاريه ياريت تجري علي اقرب مركز تحاليل وتعمل تحليل غده درقيه وهرمونات استروجين وبروجيسترون وتطلع ع دكتور النسا بتاعها هيديلك العلاج المناسب ليها 

سادسا واخيرا . اهتم جدا بالفيتامينات بتاعتها وسجل مواعيدها بمنبه علي الموبايل وفكرها بيها وهاتلها كوبايه ميه كده عشان تاخدهم .🥛🥤

عزيزي الرجل انت استحملت كتير ومش باقي غير القليل وكل الاحترام والتقدير ليك 🌺

اكتئاب ما بعد الولاده بيظهر بعد الولاده ب ٣ ايام وممكن يستمر لشهور طويله ، ف لو حضرتك عملت الخطوات اللي فوق هنتجنب اكتئاب ما بعد الولاده والدخول في مشاكل احنا في غني عنها ⁦✌️⁩

اكتئاب ما بعد الولاده حقيقه ولا دلع ستات !

اكتئاب ما بعد الولاده حقيقه نتعامل معاها بحرص وربنا يتم نفاس المدام علي خير ⁦❤️⁩